Ғұн көсемі Аттиланың жұмбақ тарихы әр дәуірде әр қырынан аршыла бермек. Дарынды қолбасшы, көрнекті дипломат және тапқыр стратег бола білген ол Азияның өзегінен Еуропаның орталығына дейін таралған сансыз ғұн тайпаларын біріктіріп, он жылдан астам уақыт ішінде Арал теңізінен Дунайға дейін созылған алып империя құрды. Шығыс және Батыс Римнің шаңырағын шайқалтса да, әйгілі екі астана – Константинополь мен Римді басып алудан бас тартып, олардың сән-салтанатынан гөрі киіз туырлықты «ағаш сарайын» артық көрді. Көшпенді халықтардың ұлы көшін бастап, ат дүбірімен Еуразия құрлығын дүр сілкіндірген ұлы тұлғаның тарихы барша оқырманның тарихи танымын тереңдетіп, рухын асқақтата түсері сөзсіз. Кітап ықылым заманның заңғар тұлғаларын танығысы келген, ежелгі көшпенділер тарихына қызығатын барша оқырмандарға арналады.